O Club Piragüismo Portonovo estrea a súa nova sede
Por Redacción
O Concello de Sanxenxo entregou este xoves as chaves ao Club Piragüismo Portonovo da súa nova sede.
Ao acto, ademais de representantes do propio club como o seu presidente Alberto Rodríguez, acudiu o alcalde da localidade, Telmo Martín, quen recoñeceu que "estamos aquí para resolver unha histórica e xusta petición".
Segundo explicou o rexedor a nova casa do Club Piragüismo Portonovo conta con "case 300 metros cadrados con cabida para 104 embarcacións", basicamente algo "que merece un club que leva moitos anos facendo as cousas ben", defendeu Martín.
Grazas ás estreadas instalacións "deixaremos de ver aos deportistas cruzar a rúa coa piragua ao lombo e poderán concentrarse na práctica da actividade", asegurou tamén o alcalde. Ademais contan cun ximnasio, uns vestiarios, unha oficina e un almacén tras un investimento de 216.019 euros.
Pola súa banda o presidente da entidade deportiva recoñeceu que o cambio será "total porque as outras instalacións non estaban pensadas para este deporte e están completamente obsoletas".
Unha vez que conclúa o traslado de material á nova sede, a actual nave que funciona como almacén situada en Baltar será retirada do espazo para a recuperación dunar da zona.