Eduardo Gallardo, Mario García e Jesús Manuel Cardo loitarán por un posto de finalista no Campionato de España
Por Redacción
Dende sempre a Sociedade Ximnástica caracterizouse por levar moi poucos atletas ao Campionato de España, con algunha excepción, as mínimas sempre foron moi duras para os atletas da veterana Sociedade. Pero dende hai 7 anos, cando o equipo masculino ascendeu División de Honra o número de atletas subiu ata a decena de atletas que cada ano acoden ao Campionato. Nesta ocasión serán doce os que estarán no nacional absoluto e o que é máis importante, algúns deles con posibilidades de medallas.
Eduardo Gallardo, Mario García e Jesús Manuel Cardo teñen moi complicado o podio pero intentarán conseguir un posto de finalista e levar á Ximnástica ás medallas no relevo 4 x 400.
Eduardo Gallardo, participará nos 400 metros lisos, está o 14 do ránking de competidores e será o primeiro da Ximnástica en entrar en liza o sábado ás 12:15 horas, correrá as semifinais e o domingo ás 21:20 horas disputarase a final. Pero tamén estará no relevo 4 x 400 da Ximnástica o domingo ás 23:30 horas.
A súa marca de 48.57 meteulle no Campionato de España "no ranking español deste ano podemos ver moita xente que correu en 46 segundos, meterse na final é moi complicado, pero sen dúbida loitaremos para rebaixar a marca persoal e conseguir a mellor posición posible. Ademais correr en Madrid supón un plus de motivación", asegura.
En canto ás posibilidades de medalla no relevo longo, Gallardo recorda que "este ano conseguimos un gran rexistro na liga, colocándonos coa terceira mellor marca dos equipos inscritos no Campionato. Iso significa ter posibilidades, pero non nos asegurar un posto no podio. Atletas doutros equipos conseguiron chegar en moi boa forma a esta cita e na proba de relevos pode pasar de todo. Non obstante, non dubido en que estaremos a loitar pola medalla ata o final".
Mario García. Foi o último en entrar na lista de participantes no Campionato, na proba de salto con pértega, que comezará o domingo ás 20:55 horas.
Este ano os resultados non lle acompañaron, tras tres tempadas consecutivas saltando coa pértega a barreira dos cinco metros; leva 4.95, feitos o pasado inverno. "Non me esperaba para nada estes resultados. Adestrei moi ben todo o ano pero por desaxustes técnicos en pista cuberta non puiden saltar máis. E de cara ao aire libre empecei moi ben cun 4,90 alto na última liga, pero todo se torceu e pase por unha focha psicolóxica bastante dura, o que me impediu facer unha boa marca".
En Alcobendas todos os seus competidores están por enriba de cinco metros "sen dúbida a falta de boas competicións previas ao campionato é un hándicap grande. Pero nas últimas semanas as sensacións foron a mellor, cada día vou máis confiado e seguro. Espero seguir coa progresión e se é así, pode saír a marca que levo buscando todo o ano. Nunca é tarde, e como digo sempre, gústame ir de tapado".
Finalmente Jesús Manuel Cardó, enfrontarase á dura disciplina dos 3.000 metros obstáculos, unha das probas de máis calidade do Campionato. Tres atletas xa teñen a mínima A para o mundial de Moscú e hai un cuarto que está moi preto. O domingo ás 22:55 horas será a carreira.
Na súa última carreira conseguiu baixar dos nove minutos nos 3.000 metros obstáculos "os adestramentos que estiven a facer estas últimas semanas fan pensar que podería achegarme á miña marca persoal de 8:39, se fose así estou seguro de que lograría un bo posto e estaría preto dos 8 primeiros, pero unha cousa é saber que podes conseguilo e outra é que ese día salga todo perfecto para logralo, as carreiras son todas diferentes pero con confianza espero poder facer un bo papel".