Os representantes galegos conquistaron un total de 16 medallas no arranque do Campionato de España de piragüismo
Por Redacción
José Luis Bouza, do Kaiak Tudense, foi o gran protagonista do Campionato de España de piragüismo ao lograr os triunfos na modalidade de C-1 nas distancias de 1.000 e 500 metros.
Sergio Vallejo, na categoría júnior, tamén logrou impoñerse nas dúas distancias. Os representantes galegos conquistaron un total de 16 medallas, entre a categoría júnior e a sénior.
A competición continuará este sábado cos barcos de equipo e rematará o domingo coas distancias de 200 metros.
Xa na xornada matinal tivo como protagonistas os galegos.
José Luis Bouza, do Kaiak Tudense, impúxose a Diego Romero, do Breogán do Grove, na modalidade de C-1 1.000 metros. Ambos os dous chegaron igualados aos últimos metros, pero o tudense foi máis forte no tramo decisivo. Tono Campos, do Ría de Betanzos, foi terceiro na clasificación final. Dos nove participantes na regata, sete deles eran galegos, unha mostra da hexemonía autonómica nesta modalidade.
En home K-1 1.000 metros repetiuse o duelo galego, aínda que nesta ocasión Javier Hernández, do Covadonga, foi o que resultou gañador. Víctor Javier Rodríguez, do Kaiak Tudense, ocupou a segunda posición, mentres Pablo Bravo, do Breogán do Grove, foi terceiro. Diego Piña, cuarto, e Gabriel Pavón, quinto, do Kaiak Tudense, conformaron as cinco primeiras posicións, nas que entraron catro galegos.
E pola tarde repetíronse as emocións fortes.
Nunha apertada chegada, José Luis Bouza logrou o triunfo na distancia de 500 metros, por diante de David Fernández, do Club de Mar de Avilesino, e Diego Romero. Entre os tres houbo unha escasa diferenza dun segundo. Rubén Millán foi segundo no K-1 500 metros, só superado por Cooper Walz, de Náutico Porpetro. Carlos Garrote, do Douro Zamora, foi terceiro, e Víctor Javier Rodríguez, do Kaiak Tudense, entrou no cuarto lugar. Entre os catro primeiros, menos dun segundo de diferenza. Pola súa banda, Laura García, do Breogán do Grove, foi segunda en K-1 500 metros.
Na categoría júnior destacou Sergio Vallejo, do Club Piragüismo Poio Conservas Pescamar. Na proba de C-1 1.000 metros superou por máis de cinco segundos a Rosbel Cordovi, do Náutico de Sevilla, e en sete ao seu compañeiro de equipo Daniel Durán.
Sergio Vallejo é unha das novas promesas con máis futuro dentro do piragüismo galego. E demostrouno pola tarde, ao gañar tamén a proba de 500 metros. Daniel Durán foi terceiro.
Jacobo Gómez Loureiro, do Club As Torres Romería Vikinga, foi segundo en K-1 1.000 metros, mentres Laura García ocupou a terceira posición no K-1 1.000 metros. Cristian Silva Pérez, do Náutico Boiro, ocupou a terceira posición en K-1 500 metros.
O Campionato de España que se disputa en Verducido terá a súa continuación este sábado e finalizará o domingo. Para a xornada do sábado están previstas os barcos de equipo, tanto dobres coma de catro compoñentes, nas distancias de 1.000 e 500 metros.