Azul celeste para a segunda equipación do Pontevedra
![Manu](/web/cache/scene/uploads/xornalistas/foto/c92/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/613a3b2f4f-20210902-patxot-radio-programa-deportes-1889.jpg)
Por Manu Otero
![](/web/cache/scene/uploads/fotos/foto/082/_S7QytKoutjK3UsovKMnMzytWsi62MjK0UipKLc6sStUxMjDQSU_/_7NK0kt0inJL1CyrgUA_/5d61b2bdb5-camiseta.jpg)
© Pontevedra CF
![](/web/cache/scene/uploads/fotos/foto/8e1/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5d6e943c41-segundaequipacionpcf.jpg)
© Pontevedra CF
O Pontevedra segue soltando pílulas do que será o seu uniforme para a tempada que comezou o 24 de agosto. A semana pasada saíu á luz o deseño da camiseta da primeira equipación do conxunto de Pasarón e este martes o club fixo o propio coa segunda, na que predomina o azul celeste.
Nas súas redes sociais, publicaron unha imaxe frontal e traseira da camiseta que empregará o equipo fóra de casa cando xogue contra escuadras que vistan cores similares ao granate. Por diante destaca, sobre o fondo azul celeste, o escudo do Pontevedra e a marca Hummel en ton granate. Ademais, do mesmo xeito que co equipamento principal, no costado esquerdo vai impresa a silueta do escudo. Así mesmo, o pescozo é en pico e nas mangas poden verse as clásicas frechas desta marca de roupa tamén en ton granate.
A parte traseira desta zamarra presenta os números na mesma cor que a camisola principal e unha lenda na zona do pescozo na que pode lerse o lema Hai que roelo.
As reaccións dos afeccionados non se fixeron esperar, moitos recoñeceron que se parece á camiseta do eterno rival, o Celta; e outros botaron en falta algún detalle máis como o prezo ou a cor do pantalón e as medias, algo que o club anunciará cando reciba a mercadoría definitiva. Con todo, a maior parte da inchada mostrou o seu visto e prace á cor da camiseta que o Pontevedra xa lucira en campañas anteriores.