O Torneo Internacional de Fútbol 7 Benxamín presenta a súa 15ª edición
Por Diego Espiño
A Xunqueira acollerá o próximo fin de semana, os días 15 e 16 de xuño, unha nova edición do Torneo Internacional Cidade de Pontevedra de fútbol 7 benxamín.
No seu décimo quinto ano o evento, organizado pola Escola de Fútbol Porteiro 2000, conta cun cartel de luxo no que figuran 18 equipos: FC Barcelona, Atlético de Madrid, Benfica, Porto, Deportivo, Celta, ACS Tampa, Lugo, Salgueiriños, o anfititrión Portero 2000 e os clasificados na fase previa AD Sagrado, Rápido de Bouzas, Arosa, Pabellón, Coruxo, Ponte Ourense, Victoria CF e Xuventude Oroso.
O Benfica defenderá título en Pontevedra nun torneo que arrancará ás 10:00 horas do sábado coa primeira fase, na que se sortearon tres grupos de seis equipos cada un. As roldas finais quedarán para a xornada do domingo, estando fixada a gran final para as 13:30 horas.
A presentación do Cidade de Pontevedra celebrouse no Hotel Galicia Palace, coa presenza de diversas autoridades e un padriño que fixo as delicias dos pequenos futbolistas presentes, o porteiro do Celta de Vigo Sergio Álvarez.