O tenis galego inicia a súa tempada en Pontevedra
Por Redacción
Un ano máis o tenis autonómico dará o pistoletazo de saída á súa tempada en Pontevedra coa disputa do Máster Galego Absoluto.
As instalacións do Casino Mercantil en Mourente serán escenario desde este xoves 3 de xaneiro da competición, na que se citan as 16 mellores raquetas do ránking autonómico tanto en categoría masculina como en feminina.
Tanto Rodrigo Figueroa como Tomás Currás, números 1 e 2 galegos, estarán en Pontevedra, mentres que na competición feminina faltará á cita Uxía Martínez, deixando o seu posto como principal cabeza de serie a Carla del Barrio seguida de Jéssica Bouzas.
O torneo iniciarase cos cruces de oitavos e cuartos de final, mentres que o día 5 de xaneiro xogaranse as semifinais e a gran final terá lugar o sábado 12 de xaneiro en horario matinal.
Ese día, 12 de xaneiro, o Pazo da Cultura acollerá ademais a Gala do Tenis Galego que premiará aos xogadores, técnicos e clubs máis destacados do último ano.