Perde fol o Arosa mentres Ribadumia e Céltiga complícanse
Por Redacción
Segue sen arrincar o Ribadumia, que non pasou do empate na Senra fronte ao Paiosaco e acumula a súa terceira xornada consecutiva sen vencer, o que lle deixa nunha apurada situación, só un punto por encima do descenso.
Tras un primeiro tempo sen goles, os de Luís Carro adiantáronse no minuto 65, cun gol de Bugallo, pero pouco duraríalles a alegría, xa que Josiño establecía o empate definitivo dez minutos máis tarde.
Os aurinegros tentárono ata o final, pero seguen penalizados pola súa falta de acerto ante a meta rival.
Consulta a acta do partido Ribadumia-Paiosaco nesta ligazón.
Empate e grazas dun Arosa que "chegou tarde" ao Municipal da Laracha e viuse obrigado a remontar para terminar estrelado na segunda parte ante a sólida defensa do equipo coruñés.
A baixa de Julio Rey, por lesión, xunto coas molestias intestinais de Luís García, obrigaron a Rafa Sáez a introducir cambios no seu equipo titular, tentando adaptar o seu estilo ás condicións do reducido escenario e custoulles, tanto que os de Óscar Gilsanz impuxéronse nos compases iniciais, adiantándose no marcador aos 12 minutos, polo sinxelo método de enviar un balón longo ás costas da defensa arlequinada que aproveitou Boedo en man a man ante Manu Táboas.
Sylla comezou a dotar ao Arosa da intensidade que lle faltaba e súa foi a acción do empate aos 23 minutos, tras cortar un defensa coa man un remate á saída dun corner. O claro penalti transformouno o mesmo Sylla.
Pero cando a tormenta parecía acougarse, Suso cometeu penalti sobre Iván. David García foi o encargado de lanzalo, pero Manu Táboas estivo soberbio para deter o máximo castigo.
As cousas cambiaron tras o descanso e o Arosa regresou ao campo disposto a mandar, pero o Laracha botouse atrás, buscando unha contra que non chegaría, como tampouco o gol dos de Rafa Sáez, que o tentaron ata o final, cunha última acción polémica, na que os vilagarciáns reclamaron penalti sobre Javi Nogueira, que o colexiado converteu en fóra de xogo.
Consulta a acta do partido Laracha-Arosa nesta ligazón.
Pinta mal o Céltiga, ao que nin sequera a substitución na dirección técnica fixo cambiar a cara e perdeu na Cheda fronte a un rival directo pola permanencia como a Polvorín, o que o deixa como vicecolista, tras un partido dominado por completo polo filial do CD Lugo.
Os branquivermellos lucenses saíron dominando e creando numerosas ocasións na primeira parte, aínda que lles faltou acerto na definición, mentres o Céltiga carecía de resposta.
Sería na segunda parte cando a Polvorín sentenciaría o choque con dous goles en pouco máis de once minutos. As primeiro grazas un gran disparo de Asier desde fóra da área, e o segundo cunha volea de Marcos á saída dun córner.
O Céltiga foi incapaz de reaccionar e queda con 14 puntos na táboa, tras encadear seis derrotas consecutivas.
Consulta a acta do partido Polvorín-Céltiga nesta ligazón.