O Salvamento Sanxenxo regresa con dúas pratas do Nacional de Longa Distancia
Por Redacción
Bo sabor de boca deixou no Club Salvamento Sanxenxo o Campionato de España de salvamento de longa distancia celebrado na cidade de Valladolid.
Alí os deportistas tiñan que afrontar tres probas: carreira con esquí de salvamento, 12 quilómetros; carreira con táboa de salvamento, 6 quilómetros; e remuda Ocean, onde 4 deportistas fan 1 quilómetro a nado, 2 a táboa, 3 quilómetros de esquí e 3 de carreira.
Polo Sanxenxo participou no campionato Juan Carlos López, logrando dúas medallas de prata nas probas de carreira con táboa e carreira con esquí de salvamento.
Tras esta cita, o club céntrase agora na última gran competición da tempada que será o Campionato de España por Comunidades Autónomas que se celebrará en Carballo e Ézaro os días 22 e 23 de setembro.