O equipo feminino da Gimnástica competirá finalmente na Segunda División Nacional
Por Redacción
Fai pouco menos dun ano o equipo feminino da Sociedad Gimnástica conseguía en Alcorcón o ascenso á Primeira División Nacional, un ascenso ao que tivo que renunciar por motivos económicos.
Inmerso nun período de renovación, "estase a traballar moi ben nas categorías base e haberá que esperar uns poucos anos para que o equipo feminino se nutra de zume novo", o club lerezano acusou os cambios perdendo case 1.300 puntos no ránking da súa categoría na fase previa.
Se a tempada pasada a Gimnástica totalizou 12.055 puntos, sendo o sexto equipo da previa, agora sumaron 10.741 puntos, quedando nun décimo lugar que non lles permite entrar na final a oito.
Coas baixas importantes de atletas por lesións no inicio de campaña, o equipo non conseguiu cubrir as 18 probas nas que se puntúa pero se asegurou polo menos a súa continuidade na Segunda División.