Esther Rodríguez e Facundo Ismael Medard gañan o Tríatlon Concello de Poio
Por Ramiro Espiño & Diego Torrado
Esther Rodríguez (Arcade Inforhouse) e Facundo Ismael Medard (Tríatlon Arteixo) proclamáronse vencedores do VIII Tríatlon Concello de Poio, proba clasificatoria para o campionato galego, celebrada este sábado.
Na categoría feminina enorme superioridade de Esther Rodríguez, que se puxo en cabeza na natación e logrou sempre o mellor tempo nos tres segmentos. Así, chegou a meta na primeira posición cun tempo final de 1:11:51. O segundo posto foi para Penélope Martínez (Tríatlon Arteixo) cun tempo de 1:15:56, mentres que terceira foi Adriana Pensado (Arcade Inforhouse) cun tempo de 1:17:30.
Na proba masculina, triunfo para o triatleta do Arteixo, Facundo Ismael Medard, que fixo unha proba moi regular, sempre en cabeza xunto ao seu compañeiro de club, Federico Scarabino. Os arxentinos saíron da auga en cabeza e fixeron xuntos a bicicleta. Foi na carreira a pe onde Facundo logrou impoñerse para chegar a meta na primeira posición (1:00:24). O segundo lugar foi para Brais Canosa (Arcade Inforhouse) cun tempo de 1:01:44, e terceiro foi Federico Scarabino (Tríatlon Arteixo).
Este tríatlon disputouse sobre a distancia sprint, é dicir, os triatletas fixeron 750 metros de natación, 20 quilómetros de ciclismo e remataron con 5 quilómetros de carreira a pe.
Os gañadores doutras categorías foron:
Cadete: María Novo (Motobike) e Juan Rey (Natación Riveira).
Júnior: María Lois (Arcade Inforhouse) e Antonio Souto (Tri-Penta Terras de Lugo).
Sub 23: Adriana Pensado (Arcade Inforhouse) e Facundo Ismael Medard (Tríatlon Arteixo).
Veteráns 1: Elena Miguéns (Olímpico de Vedra) e César Montes (Tríatlon Arteixo).
Veteráns 2: Andrés López (Tríatlon Vilagarcía).
Clubs: Arcade Inforhouse (feminino) e Tríatlon Arteixo (masculino).
No Tríatlon Concello de Poio tamén se celebra unha proba popular, na que os participantes fixeron 300 metros de natación, 8 quilómetros de bicicleta e 2,5 quilómetros de carreira a pe. En total participaron máis de 220 triatletas.
Relacionadas:
-
Carmen Gómez e Pablo Dapena impóñense no Tríatlon Cidade de Pontevedra
Por Redacción & Diego Torrado |
-
O Triatlón Cidade de Pontevedra estreará circuíto cunha espectacular transición na ponte dos Tirantes
Por Anxo Lourido |
-
En perigo varios eventos deportivos en Poio por un cambio de normativa de Portos de Galicia
Por Diego Espiño |