Empate entre aspirantes na Lomba, gañan Ribadumia e Céltiga e outra derrota do Villalonga
Por Redacción
Apértase a clasificación na loita por entrar en play-off tras o empate entre dous dos aspirantes como Arosa e Somozas, que ven beneficiados da derrota na Illa do Barco, onde o Céltiga sumou tres puntos vitais, o mesmo que un Ribadumia que deu a sorpresa en Santa Mariña ante un Choco que chegaba con catro vitorias seguidas. Pola súa banda o Villalonga e ve como a posibilidade de esquivar o descenso directo antóllase pouco menos que imposible.
A xornada en Terceira División déixanos a catro equipos igualados a 57 puntos na cuarta posición. Somozas, Barco, Alondras e Arosa seguen o ronsel do Racing Villalbés, que está tres puntos por diante, nun apaixonante final de liga, con Compostela e Bergantiños loitando entre eles polos dous primeiros postos.
Precisamente Arosa e Somozas enfrontábanse na Lomba nun partido disputado, como se presumía, no que os arlequinados mandaron nos minutos iniciais, nos que conseguiron adiantarse aos catro minutos cun gol de Manu Justo, para ceder despois o dominio a un Somozas que controlou pero sen inquietar demasiado ata o descanso.
A segunda parte foi máis movida, con ocasións para ambos os equipos, ata que cumprida a hora de xogo Quique Cubas fixo boa a "lei do ex" logrando o gol do empate, máis valioso para o Somozas que inclina ao seu favor o golaverage particular ao derrotar aos de Jorge Otero no Alcalde Candocia por 3-2.
Consulta o acta do partido Arosa-Somozas nesta ligazón.
Emoción, alternativas, goles e expulsións, de todo tivo o partido que disputaron no Salvador Otero o Céltiga e o Barco. Con obxectivos ben diferentes, os da Illa derrotaron a un Barco que segue con opcións de play-off de ascenso, logrando tres puntos importantísimos para escapar dos famosos e temidos arrastres.
A saída do Céltiga foi irresistible, tanto que en 20 minutos o marcador reflectía un sorprendente 3-0, consecuencia dos goles logrados por Rubén Márquez, os dous primeiros, e por Paco, ao transformar un penalti, o terceiro.
O partido parecía controlado polos locais, pero a expulsión do bigoleador Rubén Márquez, xusto antes do descanso, por dobre amarela, ía cambiar a decoración. Así, á volta de vestiarios, o Barco aproveitou a súa superioridade numérica para recortar distancias, con goles de Rubén García e Mitogo, pero o mesmo Mitogo encargábase de frustrar a remontanda dos seus, recibindo dúas amarelas nun minuto que restablecían a igualdade numérica.
Ata o final o Barco buscou o empate, pero o Céltiga resistiu para terminar conseguindo unha importante vitoria.
Consulta o acta do partido Céltiga-Barco nesta ligazón.
Vitoria para practicamente selar a permanencia a salvo mesmo de calquera posibilidade de arrastre. O Ribadumia deu a badalada en Santa Mariña derrotando a un Choco que chegaba nun gran momento, pero que non puido cos da Senra.
Miguel Vázquez poñía por diante aos aurinegros aos 18 minutos de partido, e co Choco buscando o empate á desesperada, Rubén Cerqueiras sentenciaba no 85 facendo o 0-2 definitivo, que deixa ao Ribadumia en terra de ninguén, pero nunha posición cómoda en metade da táboa.
Consulta o acta do partido Choco-Ribadumia nesta ligazón.
Dez puntos, que en realidade son 13 polo arrastre máis que probable do Cerceda, separan ao Villalonga da permanencia, cando só quedan 15 en xogo. A derrota fronte a un dos aspirantes ao play-off como o Racing Villalbés, deixa aos de San Pedro con pé e medio de volta en Preferente.
Sergio Arias abría a conta para os lucenses aos 20 minutos para dar tranquilidade aos seus. Na segunda parte nun minuto houbo dous goles, o segundo do Villalbés, obra de Álex Pérez, e a resposta local a cargo de Diego Lamas que parecía dar algo de esperanza á parroquia local, pero novamente Sergio Arias marcaría diferenzas co terceiro tanto, aos 77 minutos, para deixar aos seus en solitario no terceiro posto da táboa.
Consulta o acta do partido Villalonga-Racing Villlabés nesta ligazón.