Nova rebaixa nos prezos para o importante partido entre Pontevedra e Racing de Ferrol
Por Diego Espiño
Sen marxe de erro nos catro partidos que restan de liga regular, o Pontevedra encoméndase á súa afección en busca dunha remontada que lle permita asaltar os postos de play-off de ascenso.
A catro puntos de Compostela e Deportivo B, os granates depeden dos resultados dos seus rivais e de non se deixar ningún punto máis no camiño, empezando pola visita do xa campión de grupo, o Racing de Ferrol.
Ao igual que no encontro ante o Compostela, para este partido (domingo 17:00 horas) o Consello de Administración decidiu rebaixar substancialmente os prezos das entradas para lograr unha maior asistencia no Estadio Municipal de Pasarón.
Coas medidas acordadas, cada socio poderá retirar ata dúas entradas para acompañantes ao prezo de 3 euros en Tribuna, 2 en Preferencia e 1 euros nos fondos. Ademais, a entrada para o público será de 12, 8 e 5 euros respectivamente, sendo o importe para os Júnior de 6, 4 e 2 euros.
A venda das entradas desenvolverase de xeito anticipado e en horario de oficina nas novas dependencias do club, en Pasarón, e na billeteira do estadio o sábado de 10:30 a 13:30 horas e o domingo no mesmo horario matinal e dende hora e media antes do encontro.