O bádminton pontevedrés empeza a facerse notar a nivel nacional con resultados como o logrado por Raquel Miguens no Máster Absoluto de Granollers.

A xogadora do Club Bádminton Ravachol Pontevedra, que chegaba á cita catalá como terceira cabeza de serie na modalidade de dobres mixtos xunto ao onubense Adrián Márquez, logrou subir ao podio da competición ao facerse coa medalla de bronce.

A pesar de chegar á cita con molestias físicas, Miguens e o seu compañeiro demostraron un alto nivel na fase de grupos e avanzaron ata as semifinais, onde caeron ante Marc Gallardo e Laia Oset (Granollers/ Pitius) nun emocionante partido a tres sets que se resolveu por 21-18, 16-21 e 15-21.

Con este resultado a parella galego-andaluza sobe postos no ránking nacional e avanza no seu obxectivo de chegar ao próximo Campionato de España como cabezas de serie.

A actividade do Bádminton Ravachol completouse a fin de semana coa presenza de Nacho Xesteiras e Pablo Chantrero na proba do circuíto galego sub-13 en Pereiro de Aguiar.