Bea Gómez acode á concentración da Selección Española en Tenerife
Por Redacción
Se algo demostrou o recente Campionato de España Open celebrado en Ponte Muiños é que Beatriz Gómez Cortés se instalou definitivamente entre a elite da natación nacional.
A nadadora do Galaico, que conseguiu tres mínimas mundialistas na cita de casa, foi convocada para os dez días de concentración, ata o próximo 27 de abril, que realizará a Selección Española nas instalacións de Tenerife Top Training, na localidade tinerfeña de Adeje.
As xornadas de adestramento servirán para que os técnicos nacionais ultimen a preparación de cara ao Mundial que se celebra este verán en Barcelona.
Foron citados 19 nadadores entre os que se encontran, ademais da pontevedresa, Mireia Belmonte, Duane da Rocha, Melanie Costa, Aschwin Wildeboer, Marc Sánchez ou Rafa Muñoz. Todos eles estarán tutelados polo director de alto rendemento da federación, José Antonio del Castillo, e os adestradores Bartosz Kizierowski e Frederic Vergnoux.