O Pontevedra viaxa a Talavera coa intención de recuperar os puntos perdidos
Por Diego Espiño
Esta sendo unha das semanas máis duras da tempada para o Pontevedra Club de Fútbol. No físico porque varios xogadores seguen con problemas debido ao esforzo de xogar dous partidos en apenas tres días, e no anímico por perder a posibilidade de sumar tres puntos (un en Ponferrada e dous máis ante o Fabril) con senllos goles no tempo de desconto.
A competición non dá tregua e sen tempo para lamentarse os granates deben afrontar unha nova xornada ligueira, e fanno ademais co desprazamento máis longo do ano (693 quilómetros) para visitar este domingo (12:15 horas) ao Talavera.
O conxunto manchego marcha na décimo quinta posición con 13 puntos, un menos que o Pontevedra, pero chega á cita no seu mellor momento da tempada. O equipo adestrado por Fran Alcoy tardou oito xornadas en coñecer a vitoria, pero desde entón gañou tres partidos, empatou un e só perdeu outro, ante o Fabril, o que lle fixo abandonar os postos de descenso.
Importante cita por tanto para os de Luisito, que necesitan recuperar os puntos perdidos para consolidarse polo menos na zona tépeda e poder traballar con tranquilidade.
O técnico segue pendente do estado físico de varios futbolistas, como Adrián Léon, Álex González ou o pichichi David Añón, todos eles con diferentes molestias pero incluídos na convocatoria. A boa noticia será o regreso de Kevin Presa tras a súa sanción dun encontro e a mala a ausencia de Álex Fernández e Carlos Ramos, que se quedaron fóra por problemas musculares.
Deste xeito, os 18 xogadores convocados por Luisito son: Edu Sousa, Anxo Pérez, Miguel Ángel, David Goldar, Bruno Rivada, Álex González, Adrián León, Jorge Hernández, Víctor Mongil, Jesús Berrocal, Marcos Álvarez, Iván Martín, Adrián Mouriño, Kevin Presa, Ion Etxániz, Prosi, David Castro e David Añón.
Pola parte talaverana, a única ausencia para o encontro será a do defensor Chato, lesionado.
O colexiado encargado de dirixir o encontro será o estremeño Antonio Sánchez Sánchez.
Relacionadas:
-
Luisito presenta a súa dimisión tras a derrota en Talavera
Por Diego Espiño |
-
Trinta minutos e apagamento dun Pontevedra que se afunde repetindo erros en Talavera (2-1)
Por Redacción |
-
O desconto volve amargar ao Pontevedra ante o Fabril (2-2)
Por Diego Espiño & Diego Torrado |
-
Na última xogada do partido o Pontevedra cae en Ponferrada (1-0) tras facer un exercicio de supervivencia
Por Redacción |