Sorteado o cadro de competición da primeira fase da Copa RFEF
Por Redacción
A Federación Galega de Fútbol efectuou este xoves o sorteo de competición da fase autonómica da Copa Real Federación Española de Fútbol.
Arosa, Ribadumia e Cétiga, que xunto ao Alondras representarán á delegación pontevedresa, xa coñecen cruzamentos e datas para esta primeira fase do torneo.
O Pontevedra Club de Fútbol quedou nesta ocasión exento ao clasificarse para a Copa do Rey.
A fase autonómica de Cópaa RFEF constará de tres eliminatorias (previa, cuartos e semifinal) e unha final, que dará acceso á fase nacional na que se competirá polo título e a recompensa de 90.152 euros que se lle outorgará ao campión.
Na parte do cadro destinada aos equipos da zona sur de Galicia, Arosa e Céltiga disputarán unha das previas o día 26 de xullo. O equipo que avance no duelo arousán medirase en cuartos de final ao Coruxo de Segunda División B.
Pola súa banda o Ribadumia esperará rival da outra eliminatoria que disputarán Alondras e Barbadás.
Negreira, Bergantiños, Silva, Cerceda e Somozas serán os equipos do norte de Galicia que pelexarán por chegar á final e facerse cos 3.005 euros de premio para o vencedor da fase rexional.
Todas as eliminatorias disputaranse a partido único, estando fixados os cuartos de final para o día 30 de xullo, as semifinais para o 2, 6 ou 9 de agosto e a final autonómica para o día 12 de outubro.