A solidez do Tudelano a domicilio, seria ameaza para o Pontevedra
Por Diego Espiño
Importante xornada para o Pontevedra Club de Fútbol, que tras o esforzo sen premio realizado no campo do Osasuna B quere manter baixo control aos seus perseguidores e achegarse un pouco máis á fase de ascenso.
Para iso os granates deberán superar este domingo (17:00 horas) no Estadio Municipal de Pasarón a un equipo que fóra da casa estase a mostrar como moi difícil de bater, o Club Deportivo Tudelano.
O cadro navarro só perdeu dous dos 15 partidos que xogou a domicilio esta campaña, ante Real Racing e Celta B, o último deles o 29 de outubro. Desde entón non saíu derrotado en ningún dos seus desprazamentos.
Con todo non chega o Tudelano en bo momento a Pasarón, despois de catro xornadas sen gañar, noveno na clasificación e con novo adestrador. O británico John Clarkson, que tomara as rendas do equipo a cambio de achegar patrocinadores ao club, dimitiu esta semana deixando no cargo ao seu segundo, Íñigo Valencia.
No Pontevedra Luisito traballou durante toda a semana coa incógnita de como recompoñer a liña defensiva, ante a baixa por sanción dos seus dous laterais titulares, Miguel Loureiro e Bonilla. Estas dúas ausencias unidas á coñecida de Iker Alegre e con Mario Barco aínda sen recuperarse por completo dos seus problemas musculares deixan ao técnico con só 17 futbolistas do primeiro plantel dispoñibles: Edu, Santi Canedo, Adrián, Portela, Bruno, Capi, Kevin, Álex Fernández, Jacobo Trigo, Álex González, Jacobo Millán, Miki, Eneko, Añón, Abel, Mouriño e Mateu.
Tamén o Tudelano contará cunha ausencia por sanción, a do centrocapista Álvaro Corral tras a súa expulsión no último partido de liga.
O choque será arbitrado polo madrileño Fernando Bueno Prieto, que xa se cruzou cos granates no empate a dous goles ante o Coruxo no Vao.
SEGUNDA EDICIÓN DO TERCEIRO TEMPO GRANATE
Tras o encontro a agrupación de peñas granates Norte 1941 organizará a segunda edición do 'terceiro tempo granate', na que contarán coa presenza de xogadores e membros do corpo técnico.
Nesta ocasión o evento terá lugar no espazo que ocupaba no seu momento a gardería de Pasarón, entre as bancadas de Tribuna e Fondo Norte.