O liderado afástase para o Waterpolo Pontevedra tras a súa derrota ante o CN Coruña
Por Redacción
Costa arriba ponse para o Waterpolo Pontevedra o obxectivo de concluír a liga regular na primeira posición para lograr vantaxe de campo no play-off polo título autonómico.
Os pontevedreses afrontaban unha auténtica final ante o CN Coruña no Centro Galego de Tecnificación Deportiva, pero perderon por 10-12 e quedan, a falta de tres xornadas, a tres puntos dos coruñeses, que son líderes, e co average perdido. Ademais o CW Santiago colócase segundo con dous puntos máis que o Waterpolo Pontevedra.
Os de Javi de Sáa comezaron ben o choque ante o Coruña, chegando a poñerse 4-2 ao seu favor a dous minutos da conclusión do primeiro cuarto, pero o cadro visitante neutralizou pronto esa vantaxe aproveitando os erros defensivos do Pontevedra.
Cun parcial a favor que chegou a ser de 0-5, poñendo o empate ao termo do primeiro cuarto e ampliando o seu marcador despois, o equipo coruñés tomou vantaxe ao descanso (5-7).
Tras esa baixada de rendemento os locais apertaron en defensa, pero non foi ata o cuarto definitivo cando chegaron a empatar (9-9) e creron na remontada, ata que un parcial de 0-3 terminou por decidir o choque, só maquillado polo último gol pontevedrés a falta de 18 segundos.
O EQUIPO CADETE FEMININO, CAMPIÓN GALEGO
No CGTD disputouse tamén o Campionato Galego Cadete Feminino de Inverno, resultando vencedor o Waterpolo Pontevedra.
En semifinais as locais desfixéronse con facilidade do Santiago (12-1), completando un sobresaliente torneo na final ante o RCN Vigo, ao que dobregaron por un contundente 21-8. Terceiro clasificado foi a Asociación Coruñesa e cuarto o CW Santiago.