Xornada negra para Portonovo, USD O Grove e Xuventú Sanxenxo
Por Redacción
Un empate e dúas derrotas é o resumo dunha xornada na que o Portonovo deixou escapar nos últimos minutos un partido que tiña gañado, e na que USD O Grove e Xuventú Sanxenxo caeron derrotados tamén na recta final dos seus respectivos partidos.
En Baltar o Portonovo foi case sempre a remolque dun Pontellas que chegaba tras catro xornadas sen gañar, pero que atopou nos homes de Borja Burgos a solución aos seus males.
Lucho poñía por diante aos porriñeses ao pouco de comezar o partido (minuto 4), pero dous minutos máis tarde Pablo restablecía a igualdade no marcador, resultado co que se chegaría ao descanso.
Na segunda parte, de novo os visitantes pegaban primeiro. Sería Pablo Fernández quen facía subir o 1-2 ao marcador, contestado case nada máis sacar de centro por Javichu.
O Portonovo daría a volta ao marcador cun gol de Andrei, pero a falta de pouco menos de dous minutos Gabi conseguía o 3-3 definitivo, que deixa o equipo de Baltar a un só punto dos postos de descenso.
Consulta aquí o acta do partido Portonovo-Pontellas.
Chegaba ao Monte da Vila unha Cultural Areas disposta a demostrar a súa condición de aspirante ao ascenso e o seu bo momento de xogo e resultados. Os ponteareáns levaron a vitoria non sen moito traballo fronte a un USD O Grove que loitou e a punto estivo de dar a sorpresa, aínda que terminou cedendo na recta final do partido.
O equipo local adiantouse no marcador por medio de Diego Blanco, aos 13 minutos, pero pouco duroulle a alegría, pois dous minutos máis tarde os visitantes empataban cun gol de Leandro.
Ben entrada a segunda parte Castiñeira adiantaba á Cultural, pero os grovenses respondían empatando mercé a un penalti transformado por Vixo, ata que a falta de sete minutos, de novo Castiñeira conseguía marcar, dando a vitoria ao seu equipo.
Consulta aquí o acta do partido USD O Grove-Cultural Areas.
Xuventú Sanxenxo dominou e levou o peso do partido no complicado campo do Atios, pero escapóuselle o triunfo ao final despois de adiantarse por dúas veces no marcador.
Diego González adiantaba aos amarelos no minuto 13, pero os porriñeses empataban antes do descanso por medio de Noel.
Na segunda parte de novo os de Óscar García tomaban a dianteira ao marcar Luciano, pero dous goles de Álex Rey, o último a falta de menos de catro minutos para o final, daban a volta ao resultado, facendo que os puntos quedasen en casa.
Relacionadas:
-
Xuventú Sanxenxo imponse no derbi local ao Portonovo e USD O Grove cae no Carballiño
Por Redacción |
-
Duro correctivo ao Portonovo en Areas, derrota do USD O Grove e triunfo do Xuventú Sanxenxo sobre o pechacancelas
Por Redacción |
-
Gañan Xuventú Sanxenxo e USD O Grove mentres o Portonovo sae goleado de Ourense
Por Redacción |
-
Toman aire Portonovo e Xuventú Sanxenxo mentres se complica USD O Grove
Por Redacción |
-
Respira o Unión Grove cun claro triunfo, o Sanxenxo salva un punto e o Portonovo volve caer
Por Redacción |