O Leis masculino salva un punto en Zamora, o feminino cae goleado e o Cidade de Pontevedra gaña na casa
Por Redacción
O Cidade de Pontevedra camiña con paso firme na súa estrea na Segunda División Feminina de Fútbol sala.
O xoven club pontevedrés logrou esta fin de semana o seu segundo triunfo da tempada no que tamén era o seu segundo partido na casa, ante o Stilo Kirol Kluba de Bilbao (4-1).
Con ese resultado o Cidade colócase na sexta praza do Grupo I con 6 puntos.
Na mesma categoría, pero no Grupo IV, o Leis Marcón caeu goleado na cancha do Colmenarejo (6-0).
O resultado foi enganoso despois dunha primeira metade con dominio local pero boa defensa visitante e que concluíu con empate sen goles. Na segunda, a expulsión de Tami no minuto 23, e a consecuente inferioridade, foi aproveitada polo Colmenarejo para adiantarse.
Tras o gol o Leis descompúxose lixeiramente e as locais non perdoaron para ampliar a vantaxe. A pesar de que as de Raúl Jiménez reaccionaron e contaron con ocasións, no tramo final xogando de cinco viron como se lles escapaba o partido.
O Leis Marcón queda agora na décimo terceira praza cun punto.
Pola súa banda o equipo masculino do Leis salvou un punto en Zamora in extremis (2-2) nun partido que, por xogo e ocasións, puido deixar sentenciado na primeira parte.
Non estivo acertado o equipo pontevedrés de fronte ao gol na primeira metade, pero tras verse por detrás no marcador seguiu pelexando e Miguel no 34 e Carlos, xa no último minuto, rescataban polo menos un merecido punto.
O equipo adestrado por Manu Cossío é oitavo na táboa con 2 puntos.