A Copa do Mundo de Balonmán, gañada recentemente por España, estará en Pontevedra o sábado
Por Redacción
Os balonmanistas da cidade e o público afeccionado ao deporte poderán gozar durante toda a mañá deste próximo sábado día 24, da presenza na cidade da Copa do Mundo de Balonmán, recentemente conquistada por España durante o último Mundial, celebrado no noso país. Chega a Pontevedra tralas xestións realizadas polo concelleiro de Deportes, Agustín Fernández, coa Federación Española de Balonmán.
De aí que a Concellería de Deportes organizase un periplo para que os xogadores do Cisne e o Teucro podan fotografarse coa Copa e, finalmente, poñela a disposición de todos os pontevedreses na praza da Peregrina, a partir das 12.00 horas.
A xornada comezará ás 10.00 horas. A Copa estará no Estadio da Xuventude a disposición dos xogadores e a base do Balonmán Cisne. Sobre as 10.45 chegará ao Pavillón de Deportes para que podan tomar fotografías os xogadores da S.D. Teucro e a súa base.
Sen embargo, o prato forte chegará ás 12.00 horas coa chegada da Copa do Mundo á praza da Peregrina. Alí fotografarase o propio concelleiro de Deportes e, a continuación, persoeiros históricos do balonmán pontevedrés, entre eles varios xogadores internacionais, árbitros de División de Honor e mesmo exdirectivos da Federación Española. A continuación, o trofeo estará a disposición de todo o público que o desexe.
A Copa do Mundo exhibirase sobre un soporte específico e contará cun fondo para embelecer as fotografías.