Segue resistíndoselle a primeira vitoria ao Arxil que regresa derrotado (66-61) de Valladolid
Por Redacción
Décimo sexta derrota neste pesadelo de tempada para o Arxil, que segue sen sumar unha soa vitoria. A de onte, na casa do Universidade de Valladolid (66-61), produciuse despois dun bo inicio de partido, no que lograban unha vantaxe de 11-20.
Segue a tempada maldita para o Arxil. Cada xornada acaricia a vitoria, cada semana arranca os partidos con prometedores parciais, pero tamén cada semana rematan escapándoselle os puntos e esfumándose a ansiada primeira vitoria nos últimos compases dos partidos. Nesta ocasión foi o Universidade de Valladolid o verdugo das rapazas de Mayte Méndez, que non foron capaces de manter a vantaxe adquiridad nun excelente primeiro cuarto, nin sequera a pesar de chegar ao descanso un punto arriba (30-31).
Tampouco axudou a actuación arbitral, medindo con distinta rapadoira o sucedido na pintura, especialmente no último parcial, ata o punto de que o Arxil non dispuxo nin dun só lanzamento de tiro libre neses últimos dez minutos.
A excelente achega persoal de Fedorova e Huntley, con 42 puntos entre ambas as dúas non foi suficiente e o Arxil roza xa o descenso matemático, aínda que quizais agora o obxectivo sexa pechar a competición estreando polo menos a cuadrícula de vitorias e confiar nunha oportuna e hipotética repesca para manter a categoría.
UNIVERSIDADE DE VALLADOLID (66): Cristina Salinas (25), Pilar Río (9), Laura Correa (2), Clara Rodríguez (4), María Parro (10), Miriam Rodríguez (14) e Sandra Castilla (2).
C.B. ARXIL (61): Jara Tuda, Marina Rodríguez, Sandra Entenza (2), Ana Martín (10), Carla Fernández, Andrea Carrera (7), Huntley (20), Estefanía López e Olga Fedorova (22).
Árbitros: David Sánchez Benito e Saúl Pérez Hernández. Sen eliminadas.
Marcadores parciais: 11-20, 19-11 (30-31, descanso), 17-13 e 19-17 (66-61, final).
Incidencias: Pavillón Universitario Fuente de la Mora (Valladolid). Pouco máis de 100 espectadores.