O Open Cidade do Lérez enche de taekwondo o pavillón de Príncipe Felipe
Por Redacción & Diego Torrado
O pavillón do Príncipe Felipe acolleu esta fin de semana a quinta edición do Open Cidade do Lérez de taekwondo, un campionato organizado polo club Taekanart e no que participaron máis de 400 mozos deportistas.
O sábado celebrouse a competición de combate coa participación de 295 deportistas das categorías infantil, pre-cadete, cadete, júnior e sénior.
Neles, o club anfitrión proclamouse gañador na categoría masculina ao acumular 69 puntos polos 55 do Suh Sport. O Mace Sport foi quinto con 35 puntos.
Pola súa banda, en categoría feminina o mellor club foi o Patiño de Moaña, que con 39 puntos superou pola mínima ao Natural Sport. Tanto o Mace Sport como o Taekanart empataron na cuarta praza con 31 puntos.
En todas estas categorías, aplicouse o novo regulamento nacional infantil. No Open do Lérez utilizáronse petos e cascos electrónicos, así como vídeo replay.
Xa o domingo, celebrouse a modalidade de exhibición e o freestyle, cun total de 149 deportistas inscritos. En ambas as probas, a vitoria foi para o Natural Sport de Sada.
Os resultados de todo o campionato pódense consultar na páxina web da Federación Galega de Taekwondo.