O equipo feminino da Gimnástica ascende a Primeira División
Por Redacción
Obxectivo cumprido. O equipo feminino da Sociedad Gimnástica xa é novo conxunto da Primeira División do atletismo español. As pontevedresas lograron o ascenso tras gañar o encontro celebrado este domingo en Cáceres.
Desde as primeiras probas o combinado pontevedrés colocouse primeiro da competición e foi cumprindo cos resultados previstos sen abandonar o liderado. Conseguiu o ascenso de forma matemática a falta de dúas probas para celebrarse e convertendo os relevos nun mero trámite para a veterana sociedade.
En total, a Gimnástica sumou 112 puntos. Acompañaralles na Primeira División o equipo estremeño do Perceiana, que quedou segundo na fase con 100 puntos. Quedaron ás portas o Bahía Algeciras con 95 puntos, Gijón con 94 e o outro equipo galego, o ADAS Proinor, con 93 puntos.
A vitoria pontevedresa cimentouse nas seis vitorias parciais, os dous segundos puntos e os catro terceiros postos logrados nas 18 probas máis os dous relevos.
Os triunfos corresponderon a Inés Martínez no salto de altura con 1,60 metros, Paula Martín no salto de lonxitude con 5,15 metros, Mercedes De Santaló con 42,63 metros no lanzamento de disco, Ángeles Filgueira no lanzamento de xavelina con 37,19 metros e Joselyn Brea nos 3.000 metros obstáculos, batendo o record da Gimnástica con 10.55.11.
En segundo lugar quedou Loreto Brea no lanzamento de martelo con 38,05 metros e Sandra Carballo no lanzamento de peso con 10,85 metros.
Os terceiros postos foron para Emma Lorenzo no salto con pértega con 3 metros, Camila Alonso nos 3.000 metros con 10.47.43, Lucía Ferrer nos 100 metros valas con 15.91, Esperanza Caldas con 12.61 nos 100 metros e o relevo 4x100 integrado por Jiménez, Caldas, Ferrer e Carballo con 50.67.
Relacionadas:
-
Catro reforzos para o equipo feminino da Gimnástica no seu regreso á Primeira División
Por Redacción |
-
Os atletas da Gimnástica acoden o Nacional Promesa coas medallas en mente
Por Redacción |
-
A Gimnástica, a facer un bo papel na final da División de Honra
Por Redacción |
-
O ascenso do equipo feminino da Gimnástica pasa por Cáceres
Por Redacción |