A SD Teucro organiza a segunda edición da súa escola de verán
Por Redacción
A SD Teucro organiza do 27 de xuño ao 29 de xullo a segunda edición da súa escola de verán. Trátase dunha actividade que se pensa como alternativa ás ludotecas que se organizan en Pontevedra nesta época do ano.
Así, buscan dar un respiro aos nenos e nenas da cidade para que saian da súa zona de confort proporcionándolles unha nova contorna, novos compañeiros, novos monitores e novas actividades, segundo destacan os seus organizadores.
A escola de verán está impartida por monitores da Sociedade Deportiva Teucro pero non se centra só en balonmán, nin na actividade física, senón que quere ir un pouco máis aló.
Ademais dos programas deportivos, tamén ofrecerá actividades culturais, conferencias con deportistas e corpo técnico de alto nivel e iniciativas ao aire libre, tratando de potenciar a conexión de xogos e ámbito da cidade.
Segundo adiantan desde a SD Teucro, realizaranse actividades na praia fluvial, a Illa das Esculturas, xogos no centro de Pontevedra con karts de pedais, unha ruta de sendeirismo polo Lérez, xunto con todas as actividades que se realizarán no pavillón multiusos de Pontevedra e as clases maxistrais.