Cinco medallas para a Sociedad Gimnástica no campionato galego cadete
Por Redacción
Cinco medallas, catro delas de ouro e unha quinta de prata, logrou a Sociedad Gimnástica no campionato galego cadete de atletismo, celebrado esta fin de semana na pista municipal da Malata (Ferrol).
O club pontevedrés acudiu a esta cita cun total de 25 deportistas, polo que aseguran que o balance é moi satisfactorio.
Marco Martínez subiu dúas veces ao máis alto do podio ao impoñerse no salto de lonxitude, cunha marca de 6.26 metros, e no salto de altura, onde logrou 1.75 metros.
Os outros dous ouros foron para Pablo Tojal cun lanzamento de 3.60 metros na pértega e Iria Filgueira que lanzou o martelo ata os 40.20 metros.
Por último, María Jiménez levou a prata no lanzamento de disco.
A Sociedad Gimnástica coas súas cinco medallas alcanzou o terceiro posto na clasificación xeral do campionato.
Con estes resultados, a Federación publicará en poucos días a selección galega que acuda ao campionato de España de Federacións Autonómicas, que será o 18 de xuño en Cartaxena, no que probablemente estarán os tres campións galegos do club pontevedrés.