Texas, cita clave para Saleta Castro
Por Diego Espiño
Será o seu segundo Ironman do ano tras o 70.3 de Monterrey, cuarta proba coa que puntúa no ránking de clasificación para o Mundial de Hawaii e que debería situarla a un paso do seu obxectivo.
Saleta Castro afronta este sábado 14 de maio (13:25 horas en España) o Ironman de Texas, na localidade de The Woodlands, unha cita clave nas súas aspiracións de estar esta tempada no Mundial da especialidade en Kona.
A triatleta pontevedresa conta agora con 1.375 puntos no posto 65 ránking, e un bo resultado pode poñela ao bordo das 35 mellores, postos que outorgan a clasificación para Hawaii, a falta de rematar a faena coa opción de puntuar nunha quinta carreira.
O Ironman de Texas, proba que será tamén Campionato Norteamericano da especialidade, repartirá 4.000 puntos e o seu vencedor terá acceso directo ao Mundial.
Con todo as favoritas en The Woodlands serán as deportistas locais como Kelly Williamson, Alicia Kaye ou Sarah Pampiano, entre outras. Ademais loitarán polos postos de honra a alemá Julie Gajer ou a asutraliana Rebekah Keath.
Entre elas aspira a coarse a pontevedresa, logrando unha boa marca nos os 3,8 quilómetros de natación, 180 quilómetros de ciclismo e o maratón final que compoñen o circuíto da competición.