Móstoles FSF decide no último minuto o seu partido fronte a Poio Pescamar (3-2)
Por Redacción
Vitoria pola mínima do Móstoles ante o Poio Pescamar nun partido moi competido, resolto polo equipo local no último minuto, deixando sen puntuar ás galegas, que mereceron algo máis.
Con este resultado as madrileñas asíntanse na novena praza da táboa clasificatoria, mentres o Poio aínda necesita un punto nas catro xornadas que restan, para asegurar a permanencia de forma matemática.
O choque comezou con dominio alterno entre dúas escuadras que chegaban á cita faltas de efectivos pero non que renunciaron a tratar de buscar a vitoria. O primeiro gol do partido anotábao Ballesteros para as mostoleñas aos catorce de xogo nun remate raso potente.
Tres minutos máis tarde, igualaban as pontevedresas por mediación de Claudia, que sacaba partido dun balón solto na área local. Co empate chegábase ao descanso nun primeiro tempo equilibrado e con ocasións para unhas e outras.
No segundo tempo, repetíase a tónica inicial, cos dous equipos seguros en defensa e buscando sorprender ao rival ao contragolpe. Aos 28 minutos Didi desde quince metros de potente disparo adiantaba de novo ao Móstoles, pero faltando cinco minutos o Poio Pescamar volvía empatar cun remate á escuadra de Charo, despois dunha gran xogada persoal.
As locais optaban polo xogo de cinco e a pouco máis dun minuto do final, Inma finalizaba en gol unha precisa xogada colectiva das madrileñas. O Poio optaba entón tamén polo xogo de cinco, pero sen ocasións claras para arrincar a igualada nos instantes finais.
MÓSTOLES FSF (3): Etayo; Celia, Inma, Ballesteros, Didi -cinco inicial-, Alba Pena, Rocío e Luci (p.s.).
POIO PESCAMAR (2): Irene; Ale de Paz, Yoli, Charo, Claudia -cinco inicial-, Jenny, Nere, Elena e Pipi.
Árbitros: Núñez Galván e Salinas García (Madrid). Sen amoestacións.
Goles: (1-0) Minuto 14 Ballesteros. (1-1) Minuto 17: Claudia. (2-1) Minuto 28: Didi. (2-2) Minuto 35: Charo. (3-2) Minuto 39: Inma.
Incidencias: Pavillón Villafontana (Móstoles-Madrid). Uns 300 espectadores.