O Pontevedra Canteiros de fútbol americano estréase en competición oficial
Por Redacción
Despois de preto dous anos de adestramento, ao Pontevedra Canteiros, equipo de fútbol americano con sede na cidade de Lérez, chegoulle a quenda ao fin de debutar nunha competición oficial.
Farao participando nunha xornada da liga Galega de Fútbol Flag que terá lugar no campo da Xunqueira o vindeiro domingo 1 de maio, desde as 16:00 horas.
O primeiro equipo da cidade que practica o fútbol americano estrearase nunha modalidade, o Flag, con equipos mixtos de cinco xogadores e onde o contacto está prohibido, aínda que non perde de vista o seu verdadeiro obxectivo, formar un equipo de Tackle, o deporte tal e como se coñece, con cascos e corazas.
A estrea de Pontevedra Canteiros prodúcese na terceira xornada da liga Galega, tras a suspensión da primeira e tocarlle descansar na segunda.
O equipo pontevedrés disputará esta tempada a Segunda División con outros seis equipos: Coruña Atlantics Freshmen, Towers Chieftains, Royal Towers, A Estrada Bestas, Morrazo Krakens e Vigo Guardians "B".
Na xornada organizada na Xunqueira, os Canteiros recibirán aos equipos do grupo sur, é dicir, A Estrada Bestas, Morrazo Krakens, Vigo Guardians "B".
RECOLLIDA SOLIDARIA DE ALIMENTOS
Aproveitando a ocasión, o club deportivo quixo completar a xornada habilitando unha recollida solidaria de alimentos en beneficio do Comedor Social de San Francisco.