Pontevedra, cidade de fútbol americano
Por Diego Espiño & Mónica Patxot
Un novo club asoma na extensa oferta de entidades e disciplinas deportivas na cidade, e faino cun deporte aínda pouco coñecido para o gran público en España pero que "es vicioso porque cuando empiezas ya no puedes parar".
Así explica Antonio Vázquez a súa idea, xunto a un amigo, de impulsar en Pontevedra un equipo de fútbol americano, bautizado recentemente como Pontevedra Canteiros CFA. Nesa tarefa levan máis dun ano, despois de xogar en Madrid ou Vigo, pero é agora cando, cunha base estable de "10 o 12 jugadores" déronlle un impulso coa intención de inscribirse na próxima liga galega de Fútbol Flag, unha modalidade deste deporte para principiantes e sen contacto físico.
"En EEUU el Falg se usa para que los niños empiecen a tener contacto con el balón, no puedes tocar al rival para nada pero te permite entrenar el tema de la recepción de las manos y las rutas", explica o adestrador do equipo, Nacho Martínez 'Playón'.
Para logralo deben ser polo menos 15 xogadores, aínda que só cinco salten ao campo nun partido desta modalidade. Sería "el primeire paso", sinala Antonio, para seguir crecendo e formar un equipo de 'tackle', a versión tradicional e coñecida do fútbol americano, un deporte cuxa final da liga profesional, a Superbowl, é o segundo evento máis seguido do planeta tras a final do Mundial de fútbol.
En Galicia existen xa oito clubs de fútbol americano rexistrados na Asociación Galega (A Estrada Bestas, Barbanza Bulldogs, CFA Trasnos de Narón, Coruña Atlantics, Coruña Towers, San Francisco Teo Football, Santiago Black Ravens e Vigo Guardians), e outros tres en formación (Vilalba Xabaríns, Xinzo de Limia e Cangas Krakens).
En canto aos Pontevedra Canteiros, seguen en proceso de captación para a súa particular familia, a través dos seus perfís de Facebook e Twitter. Non poñen límite de idade xa que o Flag "poden xogar os junior" e os equipos poden ser mixtos.
O seu principal problema, como pasa en moitos dos deportes minoritarios, é o financiamento, xa que á ficha federativa de 200 euros que custea cada xogador únese "que cada balón cuesta treinta y tantos euros o cada equipación de un jugador como 100 euros. Para ser una liga amistosa hay un presupuesto de casi 5.000 euros, que es una locura", explica Nacho, todo iso sen sumar a coraza ou o caso necesario para xogar 'tackle'.
Iso non desmotiva aos integrantes de Canteiros, que acoden relixiosamente cada luns á súa cita no campo de adestramento, que polo momento está situado no campo de fútbol de IES Xunqueira.