Os Raposos decide recuperar a Volta Pedestre a Aios
Por Redacción
A asociación xuvenil Os Raposos de Aios ultima os detalles organizativos para a celebración este domingo, día 24 de abril, da XXIX Volta Pedestre a Aios, unha actividade que serve de anticipo ás festas de San Antoniño.
Tras dous anos de ausencia recupérase unha proba con gran tradición, que encara a súa edición número 29.
Como novidade na competición popular inclúese unha cronoescalada desde Bascuas ata o Alto do Copetiño, no que gañará o corredor que realice un mellor tempo durante a ascensión.
En canto á carreira popular, terá diferentes categorías empezando polos pitufos e prebenxamines, que completarán 150 metros de percorrido. Benamines e alevíns afrontarán 1.500 metros de carreira, infantís e cadetes 3.250 metros e a categoría absoluta contará cun percorrido de 5.750 metros.
As inscricións para a proba poden formalizarse ata o xoves 21 de abril a través do correo electrónico osrapososdeaios@gmail.com.