Sergio Vallejo e Adrián Sieiro, fóra do preolímpico no C-2 1.000 metros
Por Redacción
Os Xogos Olímpicos afástanse para Sergio Vallejo e Adrián Sieiro (Piragüismo Poio) e para Tono Campos e Diego Romero (Breogán do Grove), tras o selectivo de canoa (C-2 1.000 metros) celebrado este domingo no encoro pontevedrés de Pontillón do Castro.
Vallejo e Sieiro disputaron ata o final a clasificación para o preolímpico europeo con André Oliveira e David Fernández, pero finalmente a embarcación Club Náutico Firrete será a que busque praza para Río de Janeiro no Campionato Europeo de Duisburg, Alemaña, o próximo mes de maio.
André Oliveira e David Fernández, tras unha loita cos padeeiros do Poio, decidiron a carreira selectiva nos últimos 100 metros logrando un tempo de 3 minutos e 42 segundos.
Máis lonxe quedaron Tono Campos e Diego Romero, que chegaban á cita como o actual C-2 da Selección Española pero que quedaron lonxe dos seus rivais.
A canoa pontevedresa terá aínda outra opción de clasificación para o preolímpico. Será no selectivo de C-1 1.000 metros, competición que se suspendeu a pasada semana polas malas condicións da pista de Trasona, debido ao clima.
Sergio Vallejo, Adrián Sieiro e Diego Romero poderán queimar entón as súas últimas opcións de lograr un billete para os Xogos Olímpicos.