Empates para Leis Pontevedra e ADFS Bueu
Por Redacción
Rozou a vitoria o Leis Pontevedra na súa visita á cancha do Xove (3-3), pero non foi capaz de manter as súas vantaxes tras adiantarse ata en tres ocasións no marcador.
Os pontevedreses perden forza na loita polo cuarto posto da Segunda B, sendo agora sextos con 39 puntos.
Dani puxo o 0-1 moi pronto, aos 4 minutos, pero no 7 os locais empataban nunha igualada primeira metade. Xa na segunda parte Raúl facía o 1-2 no minuto 22 e Manu no 24 restablecía o empate.
A historia repetiuse nos últimos minutos, co 2-3 obra de Raúl no 35 e o empate final do Xove, xogando de cinco, a falta de dous minutos por medio de Nete.
Tamén empatou o ADFS Bueu o seu partido liguero ante o Guardo (2-2), rompendo así unha serie moi negativa de derrotas.
Os do Morrazo, que seguen últimos na táboa, xogaron unha boa primeira parte e chegaron con vantaxe ao descanso grazas a un gol de Víctor Méndez. O Guardo reaccionou no inicio do segundo acto dando a volta ao electrónico, pero os de Javi Santos insistiron ata empatar cun gol de Cristian.