O Club Ciclista Farto crea a primeira escola de ciclismo da cidade
Por Redacción
Pontevedra xa pode presumir dunha nova escola deportiva na cidade nun deporte, o ciclismo, que ata agora non contaba con esta opción para as categorías de base.
O Club Ciclista Farto presentou este xoves na Casa da Cultura de Salcedo a súa nova escola de ciclismo, que nace "ante a necesidade de dotar a Pontevedra dun club de ciclismo que represente á nosa cidade no campionato galego, así como en diferentes probas a nivel peninsular", explicaron desde a entidade.
No seu primeiro ano de vida, a escola conta con dez ciclistas federados na modalidade de estrada e 30 na de BTT.
O club deu o paso de apostar pola base "grazas á achega de patrocinadores privados e ao esforzo dunhas nais e pais que queren que os seus fillos practiquen un deporte de equipo como é o ciclismo e en contacto coa natureza".