Falece o expresidente do Teucro, José Manuel Vázquez Piay
Por Ramiro Espiño
A tarde deste domingo trouxo unha luctuosa noticia para os familiares de José Manuel Vázquez Piay e afeccionados da SD Teucro, ao coñecerse o falecemento de quen foi presidente do club durante cinco anos, vítima das secuelas dunha longa enfermidade que lle afectaba desde hai tempo e da que recaera nas últimas datas.
Moi vinculado ao deporte pontevedrés desde sempre, ademais do seu paso pola directiva teucrista, Vázquez Piay era fiel seguidor do Pontevedra CF, tanto dos partidos do primeiro equipo como do filial, sendo habitual espectador tanto en Pasarón como na Xunqueira, onde tivo a sorte de ver crecer aos seus dous fillos, Pablo e José, o primeiro dos cales chegou a desempeñar a capitanía do primeiro equipo granate, exercendo posteriormente como segundo adestrador.
Vázquez Piay ocupou a presidencia do Teucro entre os anos 1979 e 1984, nos cales conseguiu o ascenso á máxima categoría, abandonando o cargo tras deixar ao club na División de Honra do balonmán español.
A condución do cadáver terá lugar este luns, ás 17:30 horas, desde o Tanatorio San Mauro, en Pontevedra, ata a igrexa de Mourente, onde se celebrarán os funerais polo seu descanso.