A lesión de Edu, menos grave do previsto
Por Diego Espiño
A volta ao traballo do Pontevedra tras o empate ante o Real Racing estivo marcada polo estado dos dous futbolistas granates lesionados o domingo durante o quecemento, Edu Sousa e Capi.
No caso do gardameta, as probas ás que foi sometido despois do choque supuxeron un alivio ao xogador e tamén ao corpo técnico, que temía unha lesión de gravidade.
Finalmente Edu sofre unha luxación nun dedo da man, polo que o seu período de convalecencia reducirase a 10-15 días. Desta forma o porteiro perderase previsiblemente o choque do próximo sábado (17:00 horas) en Astorga, pero ten posibilidades de estar dispoñible para a visita do Arandina a Pasarón o 13 de marzo.
Peor pintan as cousas para Capi, que podería estar aproximadamente un mes de baixa se se confirma o que apuntan as primeiras exploracións, que sofre un rotura muscular no xemelgo. O defensa será sometido este martes a diversas probas para determinar o alcance exacto da molestia.
Capi nin sequera vestiuse de curto no primeiro adestramento da semana, ao contrario que un Edu Sousa que realizou traballo físico ás ordes do fisioterapeuta do club, Manu Barros. Tamén compareceu en Príncipe Felipe Pablo Carnero, máis tarde que os seus compañeiros xa que só puido realizar unha serie de exercicios de recuperación.
Para contrarrestar as ausencias por lesión, Luisito recupera para viaxar a Astorga aos catro futbolistas sancionados a pasada xornada: Jacobo, Belo, Hugo e Adrián.