Un decimado Mareantes non pode co CR Ferrol (29-0)
Por Redacción
Xornada complicada para o Mareantes Hifas da Terra na Primeira Territorial do rugby galego. Os pontevedreses visitaban ao segundo clasificado, o CR Ferrol, coa intención de recortar distancias na clasificación, pero as baixas condicionaron o seu rendemento.
Os pontevedreses presentáronse en Ferrol con só 16 xogadores, e a pesar diso plantaron cara durante boa parte dun partido máis disputado do que finalmente reflectiu o marcador (29-0).
O Mareantes xogou un bo encontro pero terminou cedendo ante o empuxe local.
Este resultado non impide ao equipo da cidade de Lérez manter a terceira praza con 21 puntos, moi lonxe xa do segundo, o Ferrol, que ten 40, mentres o Pontevedra Rugby Club, que descansou a última xornada, é quinto con 16 puntos empatado co sexto.
Na próxima xornada, prevista para o sábado 27 de febreiro, o Mareantes recibirá en Monte Porreiro ao CR Lalín e o PRC xogará no campo do líder, o Campus Ourense.