O Team Thunder prepárase para volver á competición
Por Redacción
Realizar un bo papel primeiro no Campionato Galego e despois no Campionato de España en plenas condicións. É o obxectivo dos deportistas do Team Thunder de Marín que nos próximos días afrontan varias citas competitivas.
Dentro da súa preparación varios dos púxiles do club marinense acudirán a senllas veladas a próxima fin de semana en Cudillero (Asturias) e Vigo.
En Asturias pelexará Rocío Suárez, e farao ante a actual campioa nacional en categoría xoven, Andrea Matos, nun combate do peso minimosca que será a antesala de tres enfrontamentos profesionais organizados polo Asturbox de Xixón.
Doutra banda o groso do equipo elite masculino estará en Vigo no Hotel Bahía na velada organizada polo club Sagabox, competindo ante deportistas do club vigués.
Pelexarán Mario Peteiro, que se estrea en peso lixeiro ante Simón Sanjuán, Abel Ferreira en peso superligero ante Álex Barros, e Aarón González en peso welter ante Santi Alonso. A velada dará comezo ás 22:00 horas e contará con seis combates máis.