Dez malos minutos lastran ao Teucro en Guadalajara (32-30)
Por Redacción
Ano novo para a Sociedad Deportiva Teucro no retorno da liga Asobal, pero mesmo guión fóra de casa, ao encaixar unha derrota a domicilio na pista do Balonmano Guadalajara (32-30) despois dun partido no que os pontevedreses tiveron as súas opcións.
Tras realizar unha notable primeira metade, os azuis sufriron un atoamento de apenas sete minutos no segundo tempo, coincidindo cunha exclusión de Víctor Rodríguez, que resultou decisivo.
Ata entón os de Quique Domínguez mantíñanse nun choque moi igualado que arrincou cun parcial de 2-0 para os locais que o Teucro volteou deseguido, dominando o electrónico ata o descanso (13-14) grazas ao acerto ofensivo de Carlos García e Dani Hernández.
Con todo por decidir, o segundo tempo empezou cun gol de Samu antes da reacción do Guadalajara, que no minuto 37 conseguía poñerse por diante (18-17).
Quique Domínguez pedía tempo morto para acougar as cousas e durante uns minutos conseguiuno, ata o minuto 40 (20-19). Foi entón cando chegaron os peores momentos para os pontevedreses, que exclusión polo medio viron como o seu rival abría unha pequena brecha de 4 goles (23-19).
Desde entón o Guadalajara controlou con acerto o xogo levando a renda ata os seis tantos (28-22), demasiado para un conxunto azul que tentou reaccionar no tramo final pero ao que lle faltou tempo para rabuñar polo menos un importante punto ante un rival directo pola permanencia na máxima categoría.
Consulta aquí as estatísticas do partido.