Juan Antonio Saavedra logra a marca mínima para os Xogos Paralímpicos de Río
Por Diego Espiño
O pasado verán, na Copa do Mundo de Croacia, conseguira unha praza para España para os Xogos Paralímpicos de Río, e agora conseguiu selar a súa clasificación oficial.
Juan Antonio Saavedra estará en Río 2016, despois de que o tirador olímpico pontevedrés conseguise este mércores en Al-Ain (Emiratos Árabes) a mínima A que esixía a Federación Internacional.
Saavedra impúxose na categoría R6 de carabina tendido a 50 metros da Copa do Mundo de Al-Ain, cun rexistro de 207 puntos.
O pontevedrés, prata en Londres 2012, aspira a conseguir en Brasil unha medalla de ouro, para o que terá tres intentos, pois participará nas probas de carabina tendido, carabina tendido aire e carabina aire a pé.
Os de Río serán os cuartos Xogos Paralímpicos de Juan Antonio Saavedra, que xa estivo presente en Sydney 2000, Atenas 2004 e Londres 2012.