De penalti polémico no último minuto escápaselle o triunfo ao Arosa en Carballo (1-1)
Por Redacción
Chegaba o Arosa ao campo das Eiroas cunha defensa de circunstancias antes as baixas de Cardeñosa, por lesión, e de Alfonso e Marcos, por sanción, e coa necesidade de sumar os tres puntos fronte a un Bergantiños, pechacancelas da táboa, tamén obrigado a gañar.
Ao final ningún conseguiu o seu obxectivo, aínda que o máis prexudicado foi o equipo arlequinado, ao que se lle escapou o triunfo no último minuto, mercé a un penalti moi protestado, o terceiro en contra nas dúas últimas xornadas, que provocou o enfado xeneralizado de xogadores e afección arosista.
Foi como unha especie de "dejá vu" do ocorrido sete días atrás na Lomba. Se entón foi o Deportivo B o que conseguiu dar a volta a un marcador favorable ao Arosa con dous penaltis máis que discutibles, o segundo no último suspiro do partido, nesta ocasión o Bergantiños neutralizou o gol conseguido por Adrián Camiño con outra máxima pena, materializada por Rubén Márquez entre as amargas protestas dos homes de Piscis, que se queixaron amargamente da arbitraxe do colexiado ourensán Manuel Casanova Cudeiro.
O Arosa foi mellor que un Bergantiños que se limitou a cortar o xogo. No primeiro tempo o partido estivo igualado. Os locais deixaban a iniciativa aos de Piscis, que ata o segundo tempo non lograron atopar os ocos na ordenada defensa local. A ocasión máis clara do primeiro período foi un lanzamento de falta de Adrián Camiño que tocou en Cabanyes e marchouse fóra.
O segundo tempo foi outro partido. O Arousa seguiu tendo a iniciativa pero cun xogo máis rápido empezou a ter oportunidades. Aos 53 minutos o árbitro asistente invalida unha acción na que Cabanyes, tras asistirlle Camiño, quedaba só ante o porteiro. Esta acción foi moi protestada xunto a unha caída do madrileño na área rival, minutos despois.
Aos 66 minutos chegaba o gol de Adrián Camiño. Recuperación no medio campo e o capitán cunha media vaselina logra un bonito tanto desde a media lúa da área grande.
O Arousa seguiu xerando perigo tras o gol. Noutra acción polémica, Cabanyes volve caer derrubado tras un pase de Camiño. Posteriormente o madrileño cedería o balón a Camiño que mandou o coiro rozando o traveseiro. O Bergantiños só achegouse cun tímido disparo que detivo Jorge sen problemas.
Ata que chegou o minuto 89 e o colexiado decreta o penalti nun disparo que dá no peito de Rivas. A pesar das protestas, que custaron a amarela a Jorge Pérez, Rubén Márquez puxo o inxusto empate no marcador.
Consulta aquí o acta do partido.
Relacionadas:
-
Un Arosa de máis a menos termina perdendo na Lomba ante o Barco (1-2)
Por Redacción |
-
Javi Veloso chega cedido ao Arosa ata final de tempada
Por Redacción |
-
Dous penaltis moi protestados tomban o Arosa fronte ao Deportivo B (1-2)
Por Redacción |
-
Fafú reforza a banda esquerda do Arosa
Por Redacción |
-
Propósito de emenda do Arosa que sorprende ao líder Cerceda no Roxo (1-2)
Por Redacción |