O Leis cae ante o Bembrive e o ADFS Bueu na cancha do Esteo
Por Redacción
Non empezou ben o ano para o Leis Pontevedra, que se viu superado con claridade ante o Mosteiro Bembrive no seu primeiro partido de 2016.
Os de Manu Cossío empezaron dominando o choque e gozando de ocasións, pero os vigueses foron os que golpearon primeiro para poñerse dous goles arriba.
Pese ao mazazo o Leis recortou distancias antes do descanso cun gol de Miguel e continuou a remontada no segundo acto para voltear o marcador e poñerse 4-2, con tantos de Miguel, Dani e Raúl.
Con todo, cando mellor pintaba o partido para os locais e con 10 minutos por diante o Bembrive decidiu poñer en cancha o porteiro-xogador e a táctica saíulle á perfección. Empatou con rapidez e a expulsión de Raúl serviu para que se puxesen de novo por diante.
Tentou reaccionar o Leis pero o que chegaría sería a sentenza dun rival directo que agora se escapa na clasificación, xa que os pontevedreses caen ata a sexta praza con 24 puntos.
Pola súa banda o ADFS Bueu tampouco puido arrincar o ano con bo pé e caeu goleado na pista dun rival pola permanencia, o Esteo (6-1).
Os de Javi Santos mereceron mellor sorte ao desperdiciar numerosas ocasións de gol e recibir excesivo castigo nos últimos minutos de partido.
A derrota déixalles na última praza con 12 puntos no peche da primeira volta da competición. A segunda comezará a próxima fin de semana co derbi comarcal ante o Bueu.
EMPATE DO LEIS FEMININO EN LEGANÉS
Mellor foron as cousas ao Leis Marcón na Segunda División Feminina na súa visita á pista do que chegaba como segundo clasificado, o Leganés Masdeporte (3-3).
As pontevedresas foron por detrás gran parte do encontro, pero repuxéronse para chegar 2-3 ao minuto 36 de xogo. Con todo non foron capaces de aguantar o resultado e as madrileñas empataron no tramo final.
As sensacións das últimas xornadas no Leis Marcón iunvitan ao optimismo nun equipo que está situado na duodécima praza con 11 puntos.