'Fuck Cancro', unha carreira popular benéfica para loitar contra a enfermidade
Por Redacción
O paseo fluvial de Ponte Caldelas será escenario, o vindeiro sábado 16 de xaneiro, da primeira carreira popular benéfica 'Fuck Cancro', organizada coa intención de recadar fondos para a Asociación Española Contra o Cancro (AECC).
Con saída ás 17:00 horas, os participantes afrontará un percorrido de cinco quilómetros con tres voltas a un circuíto instalado entre a ponte e a praia fluvial.
A previsión é poder contar con preto de 200 deportistas, cun prezo de inscrición de seis euros, un euro para os menores de idade.
O recadado será doado aos distintos programas que leva a cabo a AECC en prevención, coidados ou atención psicolóxica e tamén á Fundación Científica de Axuda contra o Cancro, un centro investigador que traballa na procura de avances médicos relativos á enfermidade.
A carreira foi presentada este venres no Concello de Ponte Caldelas coa presenza do alcalde, Andrés Díaz, a presidenta provincial da AECC, María José Crespo, e o técnico deportivo Mario Peso.