Lucía Vázquez, a Portugal: ficha polo Maiatos/Reabnorte na busca dun salto de calidade
Por Redacción
Lucía Vázquez marcha a Portugal. A recente gañadora do Open de España 2015 de mountain bike chegou a un acordo co Grupo Desportivo Maiatos/Reabnorte para defender as cores desta formación durante a próxima tempada.
Así, tras competir durante a última campaña de forma individual, a especialista en Cros Country Olímpico (XCO) terá a oportunidade de seguir crecendo a nivel internacional na filas do conxunto luso.
"Síntome moi afortunada por contar co apoio do mellor equipo portugués de MTB e cos meus patrocinadores persoais, o que me permite continuar un ano máis disputando carreiras ao máis alto nivel", asegura a corredora pontevedresa.
O calendario de Vázquez será máis ambicioso que nunca co obxectivo de acumular puntos para seguir ascendendo posicións no ránking da UCI (Unión Ciclista Internacional). Ademais de participar na Copa do Mundo, a estrutura do Maiatos/Reabnorte ofrécelle a posibilidade de asistir a outras prestixiosas probas por Centroeuropa.
Volver brillar na Taça de Portugal, certame que se adxudicou neste 2015, e a vitoria no Campionato de España, que no mes de xullo celebrarase no circuíto ourensán de Maceda, serán os outros grandes retos da ciclista de Vilaboa.
"En España ningún equipo interesouse por terme no seu plantel, algo que me provoca certa pena, pero por sorte tiven varias ofertas de equipos portugueses", indica Lucía Vázquez, que durante toda a súa carreira sentiuse como na casa no país veciño porque "alí me aprecian máis. Valórase o meu nivel e os meus resultados".
O Maiatos/Reabnorte é un proxecto que non deixou de crecer desde a súa creación hai nove anos. Con sede na localidade de Maia, nas últimas semanas tamén concretou incorporacións de nivel para as categorías masculinas e, desta forma, tentará dar un salto de calidade no panorama internacional.
Relacionadas:
-
Lucía Vázquez inicia en Valencia a súa defensa do Open de España
Por Redacción |
-
Lucía Vázquez estrea equipo en Portugal coa súa primeira competición BTT do ano
Por Redacción |
-
Lucía Vázquez adxudícase o Campionato Galego de Ciclocrós
Por Redacción |
-
Lucía Vázquez pasa ao ciclocrós no inicio da pretempada
Por Redacción |
-
Lucía Vázquez, atropelada durante un adestramento: "¿Ni con este chaleco me veis conductores?"
Por Diego Espiño |