30 anos de voleibol en Pontevedra ben valen un torneo
Por Redacción
O pavillón multiusos da Xunqueira foi o escenario este sábado dun torneo moi especial. O Club Voleibol Pontevedra cumpre trinta anos de actividade e por iso decidiu reunir aos catro mellores equipos infantís de Galicia, xunto ao seu propio conxunto desa categoría, para disputar un campionato co que conmemorar este histórico aniversario.
Ademais do CVP Gómez Lor Multiópticas, que actuou como equipo anfitrión, participaron neste torneo Emevé, XAV Cambados, Calasancias Coruña e Xuvenil Teis. Todos eles enfrontáronse baixo o sistema de liguiña e en encontros a tres sets.
No medio dun ambiente festivo e que pretendía fomentar a convivencia e a difusión deste deporte máis que centrarse no aspecto competitivo, o triunfo foi para o XAV Cambados, que logrou a vitoria nos catro partidos que disputou ao longo das sesións de mañá e tarde.
O segundo clasificado foi o Emevé de Lugo, seguido do Calasancias Coruña e o Xuvenil de Teis. As anfritrionas quedaron en quinta posición, aínda que a diferenza de categoría non impediu que as xogadoras pontevedresas lograsen adxudicarse algún set fronte ás súas rivais.
Debido ao éxito do torneo, o club estudará celebrar unha nova edición o próximo ano e amplialo a máis categorías, tal e como sinalara na súa presentación o vicepresidente da entidade, Alberto Lúa.