Boa imaxe dos deportistas do SAPO na primeira xornada da Liga Galega de Salvamento
Por Redacción
A Piscina Municipal de Campolongo acolleu a pasada fin de semana a primeira xornada da Liga Galega de Salvamento e Socorrismo, coa presenza de seis clubs deportivos do sur de Galicia.
Ademais do Salvamento Acuático Pontevedra (SAPO), organizador da xornada, participaron na primeira competición da tempada o Club Umia, Vilagarcía, Salvour de Ourense, Salvemento Estrada e PC Sanxenxo.
Pola mañá participaron deportistas entre os 7 e 14 anos de idade, sendo o horario de tarde o reservado para as categorías de máis idade.
O SAPO participou con 30 deportistas, que deixaron unha boa impresión no inicio da tempada de inverno que terminará en febreiro coa celebración dos campionatos galegos.
Destacados foron os resultados das infantís Uxía Amoedo, Uxía Bethencourt e Yurena García, primeira, segunda e cuarta no ranking provisional da súa categoría, do mesmo xeito que os absolutos na categoría masculina, sendo segundos da xeral con Martín Tenorio primeiro e David Bemposta quinto a nivel individual.
A próxima xornada na zona sur celebrarase en Caldas de Reis o próximo día 20 de decembro.