Arquivada por segunda vez a denuncia contra o presidente do Leis, José Antonio Nieto
Por Diego Espiño
Por segunda vez a xustiza arquiva a denuncia por un suposto delito contra a integridade moral interposta por tres ex xogadoras do Leis Pontevedra contra o seu presidente, José Antonio Neto.
O Xulgado de Instrución 2 de Pontevedra rexeitou inicialmente a causa, pero máis tarde a Audiencia Provincial estimou parcialmente as alegacións das denunciantes instando a continuar coa mesma e a citar a declarar aos implicados.
Agora, tras analizar esas declaracións, de novo o titular Xulgado de Instrución, Xermán Varela, explica un auto datado o xoves 19 de novembro que os feitos denunciados "non merecen reproche penal", aínda que incide de novo que a decisión "non supón negarlle reproche a unha conduta", segundo argumenta en relación á maneira de proceder do presidente do club.
O feito de que o sobresemento se declare provisional, explica Varela, débese a que "non podemos ter probado que non existiran outros feitos ou matices ao expresado pero aclarando que todo o estudado, polos motivos ditos, no merece reproche penal", reitera.
Durante a instrución e posteriores alegacións transcurriu un ano, desde que as ex-xogadoras do Leis e o seu adestrador presentaron a denuncia contra Nieto, o 14 de novembro de 2014.
O tribunal establece un prazo de cinco días para un posible recurso da parte denunciante.
NIETO VALORA EMPRENDER ACCIÓNS LEGAIS
Tras coñecer o auto do xuíz, o presidente do Leis explicou a PontevedraViva que volverá de inmediato á primeira liña de traballo no club, da cal apartouse temporalmente mentres o proceso estaba aberto.
Ademais José Antonio Nieto asegurou que estudará emprender accións legais contra as ex xogadoras: "Me sentaré con mis abogados para saber hasta dónde puedo llegar, pero quiero que sepan lo que es pasar por el año que yo he pasado", afirmou.
Relacionadas:
-
Renovación na directiva do Leis Pontevedra
Por Redacción |
-
As ex-xogadoras do Leis presentan recurso ante o arquivo da denuncia contra o presidente do club
Por Diego Espiño |
-
José Antonio Nieto delega temporalmente as funcións de presidente do Leis "mientras dure el proceso judicial"
Por Diego Espiño |
-
A Audiencia estima o recurso das xogadoras do Leis e ordena tramitar a denuncia contra o seu presidente
Por Redacción |
-
O Leis defende que dará a baixa ás futbolistas apartadas cando "realicen a devolución do material propiedade do club"
Por Redacción |
-
As tres xogadoras que denunciaron ao presidente do Leis, pendentes do recurso xudicial e de lograr a baixa federativa
Por Diego Espiño |
-
Non admiten a trámite a denuncia de tres xogadoras do Leis feminino contra o seu presidente
Por Alejandro Espiño |