Manuel Hurtado e Leticia Fernández, triunfadores nun espectacular Medio Maratón de Pontevedra
Nin sequera a choiva puido deslucir o fabuloso espectáculo deportivo que brindou, na mañá deste domingo, a vixésima edición do Medio Maratón Cidade de Pontevedra. Foi unha carreira de récord, na que case 1.500 atletas deron o mellor de si polas rúas máis céntricas da cidade. E como en toda competición houbo gañadores, neste caso, Manuel Hurtado en categoría masculina e Leticia Fernández na feminina.
O atleta lucense, que finalizara en segunda posición en 2014, foi o máis rápido en completar as dúas voltas ao circuíto de dez quilómetros, con saída na Ponte dos Tirantes e chegada na rúa Fernando Olmedo, no exterior do Centro Galego de Tecnificación Deportiva.
Completou a proba cun tempo de 1:08:01, tres segundos menos que o marroquí Hassan Lekhili, que finalizou en segunda posición. Ambos protagonizaron un emocionante final. Chegaron igualados aos últimos metros e tan só un espectacular sprint de Hurtado decantou a balanza cara o lado do atleta galego.
O podio da proba masculina completouse co vigués Gustavo Nieves, que parou o crono en 1:08:49. Cuarto foi o corredor da Sociedad Gimnástica Iván Docampo, que foi ademais o primeiro clasificado dos participantes do Circuíto de Carreiras Populares de Pontevedra (CCCP), en cuxo programa o Medio Maratón era a última proba do ano.
Pola súa banda, a tudense Leticia Fernández revalidou o triunfo que logrou o pasado ano. Fíxoo de forma clara e sen apenas oposición. Cruzou a liña de meta en 1:20:15. A súa carreira foi case un minuto máis rápida que a segunda clasificada, a campioa de España de Maratón María Jesús Gestido, que marcou un tempo de 1:21:11. A terceira posición foi para María Soledad Castro, que finalizou a proba en 1:24:34.
Leticia Fernández foi tamén a primeira clasificada entre as participantes do CCCP.
Os resultados completos pódense consultar nesta ligazón.
O Medio Maratón de Pontevedra volveu demostrar que é un dos eventos deportivos de maior éxito da cidade. Centos de persoas saíron á rúa para gozar desta proba que, como vén sendo habitual, tamén tivo un marcado carácter solidario ao organizarse unha recollida de alimentos en beneficio do Comedor Social de San Francisco.
Relacionadas:
-
O XXI Medio Maratón de Pontevedra supera xa o milleiro de inscritos
Por Redacción |
-
O Medio Maratón de Pontevedra será Campionato Galego 24 anos despois
Por Redacción |
-
O IMD traballa en darlle continuidade ao Circuíto de Carreiras Populares coa súa cuarta edición
Por Diego Espiño |
-
O terceiro Circuíto de Carreiras Populares 'coroa' aos seus campións: Víctor Riobó e Leticia Fernández
Por Alejandro Espiño |
-
Pequenos cambios nun Medio Maratón que volve bater o seu record de inscrición
Por Diego Espiño |
-
Alto ritmo de inscrición para o Medio Maratón de Pontevedra
Por Redacción |
-
Abre a inscrición para o XX Medio Maratón Cidade de Pontevedra
Por Redacción |