A Sociedad Gimnástica comeza a preparar a tempada de competición
Por Redacción
As instalacións do Centro Galego de Tecnificación Deportiva en Pontevedra congregan xa estes días aos atletas das categorías maiores da Sociedad Gimnástica, que comezaron os adestramentos co obxectivo de chegar en boa forma á tempada de pista cuberta e campo a través.
Dado que continúan as obras de rehabilitación nas pistas de atletismo, e que supoñerán dispoñer dunha pista prácticamente nova, os adestramentos básicos están a trasladarse á zona da Avenida de Bos Aires e a Illa das Esculturas.
Aínda restan catro meses para que comece o groso do calendario de competición. Xa en novembro terán lugar as primeiras probas de cros; no mes de xaneiro iniciaranse os campionatos galegos de pista cuberta; e en febreiro os campionatos nacionais.
A Gimnástica inicia a tempada co obxectivo de seguir crecendo; un propósito que supoñería revalidar cifras históricas en canto a número de deportistas e participación en competicións. Este ano o club pontevedrés conseguíu eses récords con máis de 400 atletas e máis de 3.500 probas. Ademais o equipo masculino de División de Honra, afronta a súa décima tempada consecutiva na máxima categoría.