A SCD Pontecaldelas e a AJ Lérez, gañadores do III Torneo Mapfre de fútbol 8 de Ponte Caldelas
Por Redacción
A Sociedade Cultural Deportiva Pontecaldelas e a A.J. Lérez conquistaron o III Torneo Mapfre de fútbol 8 celebrado durante esta fin de semana no campo municipal de Chan da Barcia, en Ponte Caldelas, cunha participación duns 300 nenos e nenas nas categorías prebenxamín, benxamín e alevín.
Na xornada do sábado disputouse o torneo nas categorías benxamín e alevín clasificándose en primeiro lugar o equipo anfitrión o Pontecaldelas, que conseguiu derrotar ao Soutomaior nunha agónica quenda de penaltis que se decantou finalmente para o bando locatario. En terceiro lugar quedou clasificado o Salgueiriños, o Poio, en cuarto; A Seca, en quinto; o Ponte Caldelas B, en sexto; o Verdugo, en sétimo lugar e pechou a clasificación o Figueirido.
Na categoría alevín o gañador foi o A.J. Lérez que se impuxo na final ao Figueirido B, que ocupou o segundo lugar no podio do torneo. O terceiro clasificado foi o Ponte Caldelas que venceu ao Figueirido, que ocupou o cuarto lugar. En quinto lugar rematou o Soutomaior; en sexto, o Verdugo; en sétimo posto o Poio e pechando a táboa situouse A Seca.
O torneo prebenxamín disputouse durante a xornada matinal do domingo, pero mudouse o sistema de eliminatorias por mor da adversidade da climatoloxía quedando en primeiro lugar a A. J. Lérez, en segundo o Arcade e en terceiro lugar o Salgueiriños.